POEZI QË SHPREHIN BOTËN E PASUR KRIJUESE TË POETIT

0
425

Libri ”Mbetur në majë”, të Rrahim M. Sadiku, botoi “PROKULT- press”, Prishtinë 2016

Milazim F. KADRIU

Libri ”Mbetur në majë”, që ditë më parë u botua është vëllimi i pestë me poezi i poetit, Rrahim M. Sadiku. Ashtu sikur edhe në përmbledhjet e botuara më herët, poeti vazhdon të shpreh botën e tij të pasur krijuese, duke e pasuruar në brendi me tema e imazhe nga aktualiteti, me kujtime nga e kaluara dhe aspirata për të ardhmen.

Në këtë libër janë të prezantuara 60 poezi që janë të ndara në gjashtë cikle (Vargu valë lumi, Edhe një jetë, Kokën nën gërshërë, Herët a vonë, Më merr e më jep, Kohë e vjedhur), por që të gjitha ciklet kanë një lidhmëni mes vete. Këto poezi janë poezi të sinqerta, poezi të shpirtit, shpirtit poetik, të qarta dhe të kuptueshme.

Duke ngarendur për ta zënë frymëzimin në kalim, në fluturim e sipër, Sadiku vazhdimisht e mbanë të zgjuar imagjinatën dhe arrin ta fokusojë motivin, ngjarjen, skicën, informatën, të cilën pastaj e kumton me vargje poetike, të skalitura artistikisht dhe të kuptueshme për lexuesit.

Rrahim M. Sadiku është i dashuruar përjetësisht me fjalën poetike. Ai tashmë është njëzuar me të dhe nuk shqitet dot nga ajo, sepse e ka zbuluar mënyrën më të pëlqyeshme për komunikimin me veten dhe lexuesin.
Bota poetike e Rrahim M. Sadiku është e pasur dhe e begatshme si në perceptimin poetik të realitetit ashtu edhe të motiveve që trajton në poezinë e tij.

Poezitë e këtij libri sjellin një tematikë mjaft të gjerë, pothuajse nga çdo fushë, ato flasin për jetën, atdheun, dashurinë, ka përkushtime për personalitete të jetës kulturore… Heroizmi, qëndresa, patriotizmi në shumë poezi, tregojnë ndjeshmërinë e poetit por ka edhe poezi përmes së cilave autori shpreh revoltën e tij. Në këto vargje na vjen një botë e tërë mendimesh, një botë e pashterur. Se autori Rrahim M. Sadiku ka një qëndrim dhe unin e vet, e shpreh edhe në vargjet e tija.

Në poezitë e kësaj përmbledhjeje, poeti i ka kushtuar kujdes edhe gjuhës, stilit, shprehjes së qartë, mesazhit të motivuar dhe përgjithësisht ka arritur një nivel të lakmuar të diskursit poetik.

Poezitë e poetit Rrahim M. Sadiku dallohen sa për mendimin e thellë e plot mesazhe aq edhe për formën e bukur artistike plot metafora dhe figura të gjetura letrare që i japin poezisë së tij një tingëllim të veçantë.
Në poezitë e tij Sadiku ka thënë gjithë atë që e preokupon, e madhëron, e sheh dhe e përjeton bukur.

Si titulli ashtu edhe brendia e librit përfaqësojnë besnikërisht përmbajtjen dhe mesazhin e poezive, dhe mendoj se libri do të pritet mirë nga lexuesi ngase libri është shumë përmbajtësor dhe në nivel të lartë në artin e fjalës.

LINI NJË KOMENT

Please enter your comment!
Please enter your name here