PËRFITIMI DHE KLIENTELIZMI ELEKTORAL PARTIAK

0
433
UÇK - veteranët

Skandali “Veteranët”:

IDRIZ ZEQIRAJ

Përtej dy dekadave në liri, Kosova përjetoi krimet vrastare politike dhe gjakderdhjen financiare, duke zhvatur pasuritë e brezave shqiptarë, “sikur të ishte mall shkau”, e shprehur në zhargonin, pa cenzurë, popullor.

Njëra nga zhvatjet zyrtare, është, pikërisht, abuzimi enormë me “Dëshmitë e Veteranit”:

Së pari, shpërblimi i veteranëve, në mënyrën se si është bërë, është fyerje e rëndë, për luftëtarët e lirisë. Mbrojtja e Atdheut, (po e shkruaj më shkronjë të madhe Atdheu, sepse në Shqipëri shkruhej me të vogël, por, partia më të madhe), nuk është sakrificë, por është detyrë e parë e çdo qytetari.

Së dyti, është i tepërt krahasimi me Kroacinë, e cila ka një standard tjetër jetësor. Në ballë të luftës, atje qenë policia dhe elita ushtarake. Lufta zgjati më shumë dhe liria u fitua me forcat vetanake kroate.

Nga përvoja e Luftës së Dytë Botërore, (LDB), për Veteranët ka pasur një përkujdesje të shtuar, duke i punësuar ata. Dhe, si shtesë e pensionit, u jipej plus p.sh. 100 lekë të rinj, pra, 100 euro. Nderimi moral për veteranët, nuk mungonte. Sot, e turpshme dhe kriminale, që në në rast të vdekjes të ndonjë veterani, në masën më të madhe, jo vetëm se nuk shprehin respekt e dhimbje, por, shprehën “një më pak”, sepse po zhvatin bukën e fëmijëve tanë, ngaqë janë përzier veteranët e rrejshëm, me ata të vërtetë”! Pra, janë bërë “si lesh arapi”!

Katërfishimi fiktiv i numrit të veteranëve,
dominon shifra – 12.700 luftëtarë

Së fundi, -PRESSING-, ke T7, organizoi një debat gjithëpërfshirës dhe shterrues, ku, në mes tjerash, sqaroi dy çështje kardinale, lidhur me makro-skandalin “VETERANËT”:

E para, zhdaravati mjegullnajën e shifrave stër-smadhuese të veteranëve të rrejshëm, duke dhënë numrin e saktë të veteranëve;

E dyta, arsyen e 4 (kat) fishimit të numrit të veteranëve.

Pas afro dy orësh dabat, 5 (pesë) nga analistët u dakorduan, qoftë për numrin, qoftë për arsyet, e rritjes së rrejshme të tyre. Shkumbin Demalijaj, i cili njihet për gjynahe faktike, nuk u bind as për numrin dhe as për arsyet, që çuan në rritjen enorme të veteranëve të rrejshëm. Profesori universitar, Sadri Ramabaja, i reagoi Shkumbinit, duke i thënë se “veç ti e Ramushi nuk jeni dakord”! E saktë, sepse “e kanë mizën pas veshit”!

Profesori i Filozofisë, në cilësinë e analistit, Blerim Latifi, foli me shënime e shifra faktike. Duke iu referuar komandantëve më kompetentë, në mes tyre edhe shefit të SHP të UÇK-së, Sylejman Selimi, dha shifra të pranueshme, që i bindën edhe të tjerët në debat. Shifra e dhënë nga gjeneral Selimi, në cilësinë e shefit të SHP, prej 12.700 veteranëve, është e saktë. Këtë mendim e ka mbështetur edhe komandanti i Kosharës, Anton Quni, duke shtuar pak qindra, pra, 13 deri në 13.500 veteranë, përfshi logjistikën, emërgjencën, prapavijën.

Edhe zyrtarët e lartë, Thaçi e Veseli, përkatësisht, në cilësinë e presidentit dhe të kryparlamentarit, kanë pranuar makro-falsifikimin, duke kërkuar spastrimin e listave të veteranëve. Edhe komandantët zonalë të Drenicës, përfshirë edhe Rexhep Selimin e Sami Lushtakun, janë të një mendjeje, se rritja e numrit të veteranëve, është, katastrofisht, e lartë.

Krejt ndryshe reagojnë komandantët e Dukagjinit, më saktë, kreu i tyre, Ramush Haradinaj. Dhe, të tjerët, si me komandë, janë “aminxhinjë”! “Krejt populli ka qenë ushtarë”, – thotë Ramushi me të tijtë! Por, “harron” se edhe vet ka mbetur me 9 (nëntë), ose, e shumta, me 17 ushtarë!

Mbrojtja territoriale, e trashëguar para viteve `90-a, është aktivizuar në vitin 1990, si gadishmëri informacioni, por, pa shpresë ballafaqimi me forcat policore serbe. Ky organizim ka qenë, vërtet, në fshatra, por, përballjet janë të pakta, simbolike dhe kanë përfunduar me masakra. Dhe, për çudë, këto masakra tentohet të konvërtohen në beteja, pse jo, edhe luftë, epope! Por, viktimat janë vetëm nga pala shqiptare.

Arsyet e shtimit të veteranëve,
lakmia përfituese abuzive

Debati për arsyet e rritjes të numrit të veteranëve të rrejshëm, çeshtja është më e thjeshtë, por, jo më pak kriminale. Analisti Blerim Latifi, i renditë tri arsye:

1) Dhënia e dëshmisë, në këmbim të votës klienteliste partiake;

2) Varfëria, dëshira për ta zbutur atë, qoftë edhe me 170 euro pension veterani;

3) Thjeshtë, për t`u mburrur me një dëshmi veterani, kinse, “edhe unë kam luftuar për lirinë e Kosovës”, pa hyrë në luftë fare!

Të kësaj kategorie kemi hasur mjaftueshëm. Vinin nga Mërgata, silleshin bulevardeve e kafeneve të Durrësit dhe të Tiranës, lëshonin mjekrrën, si cjepërit, provonin si u shkon uniforma e “UÇK-së”, bënin fotografi me kallash kinez! Ja, këta janë trimat! “Ene Peqini, ka luftue me levore shalqini, ke Mulliri i Rekës”, – ka hyrë në zhargonin popullor, për të treguar se Peqini dhe të tjerët, edhe pse “kishin bërë sehir” gjatë Luftës së Dytë Botërore, por, falsifikueshëm, provonin të bëheshin veteranë. Pra, historia e veteranëve të rrejshëm, është e hershme, përkatësisht, zë fill 77 vjetë më parë!

Është politika redaktuese e mediumit, që “harron” ndonjë arsye shtesë. Por këtë e plotësojnë komentet masive, në portalet e ndyshme. Dhe, renditjes të asyeve i shtohet edhe një, pra:

Përfitimi i komandantëve, përmes shitjeve
të -dëshmive të veteranit- me sekserë. 

Kuota e çmimit blerës të “dëshmive të veteranit”, ka lëvizur dhe nuk është ajo që është proklamuar. Ajo është shumë më e majmë. Madje, ata që nuk kanë pasur para kesh, në dorë, vazhdojnë të paguajnë përqindjen caktuese, në kohë të pakufizuar!

Pikërisht, për këtë rezistenca është e egër. Në këtë lojë të pistë, është zhytur edhe Shoqata e Veteranëve të Luftës. Janë disa ish-krerë, me shokët rreth tyre, emrat e të cilëve janë lakuar, për këso punë të pista. Andaj, duan t`i manipulojnë veteranët, të vërtetë dhe të rrejshëm, me shantazhe e kërcënime, për të organizuar greva e protesta kundër qeverisë.

Opinioni gjithëshqiptar është shokuar, me vizitën nxitëse të ish-kryeministrit, Ramush Haradainaj, në selinë e OVL të UÇK-së, duke dhënë deklaratën skandaloze e penalizuese, kundër atyre zyrtarëve, të cilët kërkojnë verifikimin dhe spastrimin të listave, me veteranë të rrejshëm, me falsifikim të katerëfishtë:

“Kjo temë i kalon të kaluarës dhe kërkoj nga Kurti FORCËRISHT, që të mos tallet me veteranët, sepse – durimit të tyre i ka ardhur fundi-“! Dhe, kërcënon se “…do të dalim në rrugë të gjithë dhe nuk do të lejojmë të futet në zyrën e tij të punës”!

Mujëshinë provokative, zotëri Haradinaj, e ka manifestuar edhe në rastin e kërkesës të ligjshme, për hetimin, zbulimin dhe ndëshkimin e kriminelëve, urdhërdhënës e vrasës, të kundërshtarëve politikë dhe të dëshmitarëve potencialë, për Gjykatën e Hagës. Vrasjet numerike politike Ramushi i quan “të vjetëruara”, rrjedhimisht, të tejkaluara, që duhet heshtur dhe harruar! Por, një shprehje shqiptare thotë: “Gjaku nuk humbet”! Dhe, motoja e drejtësisë është: “Krimit nuk i skadon afati”!

Çdo koment është i tepërt! Nëse Kosova është shtet ligjor, qytetarët e saj duhet t`i disiplinojë, në rrugë ligjore. Aq më parë, kur krerët manipulatorë të të ashtuquajturave “Shoqata të dala nga lufta”, me kallauzën e tyre “OVL të UÇK-së”, me protestat vandale të Mars-Prillit 2004, të cilat sollën Decentralizimin e deri ke “Zajednica”. Së fundi, u bënë argatë të Serbisë, duke pranuar e shpërndarë, dosjet e Gjykatë Speciale, të ardhura nga Beogradi, enkas, për Shoqatën e Veteranëve!

K O M E N T E

Ju lutem, shkruaJ komentin tuaj!
Ju lutem, shkruaJ emrin tuaj këtu

Kjo uebfaqe përdor Akismet, për të ulur spam. Mëso se si procesohen të dhënat e komentit tuaj.